Prélude & Qlilit wid ibennun
****************************
Γur-wet wid i yi-yettamnen
D iles-iw i d-yeccḍen
Lmeεna ad d-teqsed bab-is
Am wakken d yiwen seg-wen
I la d-ineṭqen
Meskin yenna-d tamussni-s
Ameyyaz ad iyi-yefhem
Abhim meεḍur ad yewhem
Ad iɣil beddleɣ idis
Lerbaḥ arkul i d-yettasen
Ttmagareɣ-ten
Ẓerreɣ gar-asen amur-iw
Arraw-iw qqben, ḥeṛcen
Akk sseɣṛeɣ-ten
Srewleɣ-ten si tmurt-iw
Ajajiḥ n yidrimen
Iḥuzan arkul medden
Ur d-yenṭiḍ ijufaṛ-iw
Di lbiru iqeεεed ukersi-w
Zeddig umkan-iw
Tteffɣeɣ-d bɣiṛ lawan
Ttnadiɣ kan ad ddariɣ
Ad tẓid temεict-iw
Ad iliɣ seg wid yeṛwan
Ayen slan imeẓẓuɣen-iw
Ma ččuren-iyi-d urawen-iw
Znuzuɣ-asen-t i ccifan
Nekk mačči d win ijehlen
Ḥemmleɣ iḥbiben
D leqṛuban-iw meṛṛa
Tagnit ma yella teḥṛes-iten
Γer ɣur-i ad d-afen
Ayen akk iɣelben lehna
Nehhuɣ-ten, qqaṛeɣ-asen
D tasusmi ay d lfayda-nsen
Uqbel ad asen-d-tres nndama
Tidet ur tt-ttqeṛṛibeɣ
Γef lhemm-is reggleɣ
Reggleɣ akken ur tt-ttwaliɣ
Deg ufurek iǧehden ṭṭfeɣ
Ẓriɣ ttekleɣ
Γer lqaε ur d-ɣelliɣ
Wi yebɣan ad yaweḍ akka wwḍeɣ
Ad iyi-d-iciweṛ ad as-mmleɣ
Abrid ad as-t-wehhiɣ
Qlilit wid ibennun
Wid ara ihudden εummen
Ṭṭuqten wid yettzuxxun
Qlilit wid yesfeεlen
S iḍaṛṛen yeqqel uqelmun
Annaɣ a lwexda ay iṣaṛen
Nnif iger di lkanun
Rnan fell-as yisɣaṛen
Tamsalt urεad tferru
Fell-aɣ ma ad d-tejbu tayeḍ
Lhemm yegguma ad ɣ-yettu
Am ujeǧǧiḍ i ɣ-yenṭeḍ
Yiwen s "qull huwa llahu"
I itett tidi n wayeḍ
Iḥewweṣ dduṛu dduṛu
Lebɣi-s akken ad t-yessiweḍ
I wid yebnan sṛayat
Ansa akka asen-d-ttekken
Ass-agi ɣelben taswaεt
D tadrimt-nsen i ineqqen
D idrimen-nsen i ineqqen
Γef tarwa-nsen tban tafat
Di tmura n medden i qqaṛen
Aεekkaz n ddel neṛwa-t
D taεṛbubt i aɣ-sseḥfaḍen
Aεekkaz n ddel nerwat
D taεṛabt i aɣ-sseḥfaḍen
