Ианартәи ажәылараан иҭахаз ргәаладыршәон Афырхаҵареи Ахьӡ Аҧшеи рҳәынҭқарратә музеи аҟны_22.01.2015

Ианартәи ажәылараан иҭахаз ргәаладыршәон Владислав Арӡынба ихьӡ зху Афырхаҵареи, Ахьӡ Аҧшеи рҳәынҭқарратә музеи аҟны.
Зқьи жәшәи ҧшьынҩажәи жәаха шықәса, ианартәи ажәылараан иҭахаз аибашьцәа фырхацәа ргәалашәара иазкыз аиҧылара мҩаҧган иахьа Аҟәа, Владислав Арӡынба ихьӡ зху Афырхаҵареи, Ахьӡ аҧшеи рҳәынҭқарратә музеи аҟны. Уи иалахәын, аҳәынҭқарра анапхгареи аиҳабыреи рхаҭарнакцәа, аибашьра аветеранцәа, иҭахаз рҭаацәа. Ажәабжь иацырҵоит ҳкарреспондентцәа.
Агәалашәаратә хәылҧазы хацыркын «Ахьӡ-аҧша» апаркаҿы ашәҭшьыҵәрақәа рышьҭаҵарала.
Анаҩс ауснагӡатә иацҵан, Владислав Арӡынба ихьӡ зху Афырхаҵареи, Ахьӡ аҧшеи рҳәынҭқарратә музеи аҟны.
Амузеи аиҳабы Аҧсны афырхаҵа Мзиа Беиа еизаз ирзеиҭалҳәеит ианартәи ажәылара аҭоурых. Дазааҭгылеит усҟан аҧсадгьыл зхы ақәызҵаз аҵеицәа рфырхаҵара атәы. Ианвартәи ажәылараан иҭахеит ҩажәижәохәҩык аибашьцәа. Урҭ зегь рфотосахьақәа аекран ала идырбан.
Агәалашәара иазкыз аиҧылараҟны ицәажәон ианартәи ажәылара иалахәыз аибашьцәа, иара убас зыҷкәынцәа ҭахаз аҭаацәа.
Агәалашәаратә хәылҧазы иаҭааит Кәтолынтәи аибашьра аветеранцәа. Урҭ амузеи ҳамҭас иазааргеит аибашьраан агәыҧ «Дельфин» ирыцыз абираҟ, агәыҧ иалаз реиҳараҩык рнапы аҵаҩны.
Иҭахаз аибашьцәа ргәалашәара иазкны еиҿкааз аусмҩаҧгатә афинанстә цхыраара азыҟанаҵеит амобилтә еимадара А-мобаил.
Иара убасгьы иазгәаҭатәуп, ас еиҧш иҟоу ахәылҧаз раҧхьаӡа акәны ишеиҿкаау. Аха амузеи аиҳабы лажәақәа рыла, ари традициак еиҧш есышықәса имҩаҧгахалоит.
Аҧсадгьыл аҵеицәа рфырхаҵара ахааназ ҳажәлар ргәалашәараҿы иаанхоит.
Аслан Қәҭелиа Асҭамыр Гәажәба
22.01.2015